(जावली / अजिंक्य आढाव)फलटण तालुक्यासह ग्रामीण भागात सध्या आर्थिक टंचाईची परिस्थिती जाणवू लागली असून वाढत्या महागाईमुळे सर्वसामान्य नागरिकांचे जगणे अधिकच कठीण होत चालले आहे. दैनंदिन गरजेच्या वस्तू, इंधन, शेतीसाठी लागणारे साहित्य तसेच जीवनावश्यक वस्तूंच्या किमती सातत्याने वाढत असल्याने ग्रामीण कुटुंबांच्या बजेटवर मोठा ताण पडत आहे.
विशेषतः शेतकरी, शेतमजूर आणि छोट्या व्यवसायिक वर्गाला याचा सर्वाधिक फटका बसत आहे. शेतीमालाला अपेक्षित भाव मिळत नसताना खत, बियाणे, औषधे तसेच इतर खर्चात मोठी वाढ झाल्याने शेतकऱ्यांची आर्थिक कोंडी होत आहे. त्याचबरोबर गॅस, अन्नधान्य, भाजीपाला आदी वस्तूंच्या वाढत्या दरांमुळे सामान्य नागरिकांना रोजच्या खर्चाचे गणित जुळवणे कठीण झाले आहे.
ग्रामीण भागातील अनेक कुटुंबे सध्या काटकसर करून खर्च भागवत असल्याचे चित्र दिसून येत आहे. काही ठिकाणी रोजगाराच्या संधी कमी झाल्याने हातावर पोट असलेल्या कुटुंबांनाही आर्थिक अडचणींना सामोरे जावे लागत आहे.
महागाई नियंत्रणासाठी शासनाने प्रभावी उपाययोजना कराव्यात, जीवनावश्यक वस्तूंच्या किमती आटोक्यात ठेवाव्यात तसेच ग्रामीण भागातील रोजगाराच्या संधी वाढवाव्यात, अशी मागणी नागरिकांकडून होत आहे. वाढत्या महागाईमुळे सर्वसामान्यांचे आर्थिक गणित कोलमडत असल्याने शासनाने तातडीने लक्ष देणे गरजेचे असल्याची भावना व्यक्त होत आहे.
