(फलटण/ प्रतिनिधी) : माळशिरस तालुक्यातील दहिगाव येथील श्री 1008 महावीर स्वामी दिगंबर जैन मंदिरात अज्ञात चोरट्यांनी चोरी केल्याची घटना 5 ऑगस्टच्या रात्री ते 6 ऑगस्टच्या पहाटेच्या सुमारास घडल्याचे निवेदनातून समोर आले आहे. या प्रकरणी आरोपींचा तातडीने शोध घेऊन कठोर कारवाई करावी, अशी मागणी अहिंसा युवक कमिटी व बहुउद्देशीय सेवा संस्था, फलटण यांच्या वतीने करण्यात आली आहे.
निवेदनानुसार, चोरट्यांनी मंदिरात प्रवेश करून चांदीच्या तीन मूर्ती, चांदीचे छत्र, सोन्याचा मुलामा दिलेल्या कलशाचा बेस, तसेच दानपेटी व काचेची दानपेटी फोडून त्यातील रोकड असा ऐवज चोरून नेल्याचे नमूद करण्यात आले आहे.
या घटनेमुळे जैन समाजाच्या धार्मिक भावना दुखावल्या असून, परिसरातील नागरिक व भाविकांमध्ये चिंतेचे वातावरण निर्माण झाले आहे. चोरीचा तातडीने तपास करून चोरीला गेलेल्या धार्मिक वस्तू व ऐवजाचा शोध घ्यावा, तसेच संबंधित आरोपींना अटक करावी, अशी मागणी संस्थेने केली आहे.
याशिवाय दहिगाव येथील जैन मंदिरासह परिसरातील धार्मिक स्थळांच्या सुरक्षेसाठी आवश्यक त्या उपाययोजना करण्याचे निर्देश संबंधित प्रशासन व पोलिस यंत्रणेला द्यावेत, अशीही मागणी निवेदनातून करण्यात आली आहे.या मागणीचे निवेदन फलटण तहसीलदार तसेच संबंधित पोलिस अधिकाऱ्यांना देण्यात आले आहे.
निवेदनानुसार, चोरट्यांनी मंदिरात प्रवेश करून चांदीच्या तीन मूर्ती, चांदीचे छत्र, सोन्याचा मुलामा दिलेल्या कलशाचा बेस, तसेच दानपेटी व काचेची दानपेटी फोडून त्यातील रोकड असा ऐवज चोरून नेल्याचे नमूद करण्यात आले आहे.
