सामाजिक सलोखा राखण्यासाठी नागरिकांनी कायदेशीर मार्गाचा अवलंब करावा – डीवायएसपी विशाल खांबे

(फलटण/ प्रतिनिधी) : फलटण शहर पोलीस ठाणे हद्दीत तहसीलदार कार्यालय येथे दि. १५ मे २०२६ रोजी सायंकाळी ४ ते ५.३० या वेळेत शांतता समिती सदस्य, विद्यमान नगरसेवक आणि पत्रकारांची संयुक्त बैठक पार पडली. छत्रपती संभाजी महाराज जयंती 2026 च्या पार्श्वभूमीवर सोशल मीडियावरील स्टेटसवरून घडलेल्या प्रकाराच्या अनुषंगाने ही बैठक आयोजित करण्यात आली होती. बैठकीस उपविभागीय पोलीस अधिकारी विशाल खांबे आणि तहसीलदार अभिजीत जाधव अध्यक्षस्थानी होते.

बैठकीची प्रस्तावना नायब तहसीलदार सोनवणे यांनी केली. यावेळी फलटण शहर पोलीस ठाण्याचे सहाय्यक पोलीस निरीक्षक नितीन शिंदे, नगरपालिकेचे विद्यमान नगरसेवक, पत्रकार तसेच सामाजिक कार्यकर्ते उपस्थित होते.

बैठकीदरम्यान नगरसेवक अशोक जाधव यांनी फलटण शहरात कायम हिंदू-मुस्लिम ऐक्य असल्याचे सांगून पुढेही शहरातील शांतता आणि सामाजिक सलोखा अबाधित ठेवण्यासाठी प्रशासनाला सहकार्य करण्याची भूमिका मांडली. समाजसेवक वसीम मनेर यांनी घडलेल्या प्रकाराचा तीव्र निषेध व्यक्त केला. नगरसेवक रोहित नागटिळे यांनी प्रकरणाची सखोल चौकशी करून संबंधित इतर आरोपी आढळल्यास त्यांच्यावरही कायदेशीर कारवाई करण्याची मागणी केली.

सामाजिक कार्यकर्ते निलेश तेलखडे यांनी व्यापक स्वरूपात शांतता समितीची मोठी बैठक घेण्याची मागणी केली.

मार्गदर्शन करताना डीवायएसपी विशाल खांबे यांनी फलटण शहरात सामाजिक ऐक्य आणि हिंदू-मुस्लिम एकता मोठ्या प्रमाणावर असल्याचे नमूद केले. संबंधित घटनेत प्रथम अदखलपात्र गुन्हा दाखल करून आरोपीस डिटेन करण्यात आले होते. त्यानंतर ऑडिओ क्लिप सोशल मीडियावर व्हायरल होऊन समाजाच्या भावना दुखावल्याने पुढील कायदेशीर कारवाई करून गुन्हा दाखल करण्यात आल्याचे त्यांनी स्पष्ट केले. समाजात कोणत्याही प्रकारचा द्वेष निर्माण होऊ नये, सामाजिक सलोखा कायम राहावा तसेच अशा घटनांमध्ये नागरिकांनी कायदेशीर मार्गाचा अवलंब करावा, असे आवाहन त्यांनी केले.

तहसीलदार अभिजीत जाधव यांनी फलटण हे हिंदू-मुस्लिम एकता, सामाजिक सलोखा आणि परस्पर सहकार्याचे आदर्श शहर असल्याचे सांगितले. बैठकीच्या शेवटी नायब तहसीलदार सोनवणे यांनी उपस्थितांचे आभार मानले.