(मुंबई / प्रतिनिधी): राज्यातील पत्रकारांना धमकावणे, मारहाण करणे अथवा त्यांच्या कामकाजात अडथळा निर्माण करणाऱ्या व्यक्तींविरुद्ध कठोर कारवाई करण्यात येणार असून अशा प्रकरणांतील दोषींना थेट तुरुंगात जावे लागेल, असा स्पष्ट इशारा देवेंद्र फडणवीस यांनी दिला.
पत्रकार हे लोकशाहीचे चौथे स्तंभ असून समाजासमोर सत्य मांडण्याचे महत्त्वपूर्ण कार्य करत आहेत. त्यामुळे पत्रकारांवरील हल्ले, धमक्या किंवा दबाव टाकण्याचे प्रकार हे केवळ व्यक्तीवरचे नव्हे तर लोकशाही व्यवस्थेवरील हल्ले असल्याचे मुख्यमंत्री फडणवीस यांनी स्पष्ट केले.
यापुढे पत्रकारांना धमकावणे किंवा त्यांच्या कामात अडथळा आणण्याच्या घटनांकडे अत्यंत गांभीर्याने पाहिले जाईल. अशा प्रकरणांमध्ये तातडीने गुन्हे दाखल करून आरोपींना अटक करण्याचे निर्देश प्रशासन आणि पोलिस यंत्रणेला देण्यात आल्याची माहिती त्यांनी दिली.
पत्रकारांवरील अत्याचाराच्या प्रकरणांची द्रुतगतीने सुनावणी करण्यासाठी प्रयत्न करण्यात येणार असून पत्रकार संरक्षण कायद्याची प्रभावी अंमलबजावणी करण्यावर सरकारचा भर राहणार असल्याचेही त्यांनी सांगितले. पत्रकारांच्या सुरक्षेसाठी विशेष यंत्रणा उभारण्याबाबत सकारात्मक विचार सुरू असल्याचे संकेतही मुख्यमंत्र्यांनी दिले.
पत्रकारांनी निर्भयपणे व निष्पक्षपणे काम करावे, त्यांना आवश्यक संरक्षण मिळावे आणि दोषींना कोणतीही राजकीय किंवा प्रशासकीय पाठराखण मिळणार नाही, अशी ग्वाहीही त्यांनी दिली.
दरम्यान, पत्रकार संघटना व माध्यम प्रतिनिधींनी मुख्यमंत्र्यांच्या या भूमिकेचे स्वागत करत पत्रकार संरक्षण कायद्याची प्रभावी अंमलबजावणी करण्याची मागणी केली आहे.
“माध्यमांचे स्वातंत्र्य हे लोकशाहीचे बळ आहे. पत्रकारांच्या सुरक्षिततेसाठी सरकार कटिबद्ध आहे,” असे मुख्यमंत्री देवेंद्र फडणवीस यांनी ठामपणे सांगितले.
