जवानाच्या पत्नीचे जीवन म्हणजे त्याग, समर्पण, संयम आणि कर्तव्यनिष्ठेचे मूर्तिमंत उदाहरण – पारिजातका जगताप

(फलटण /प्रतिनिधी) : देशाच्या सीमांवर अहोरात्र सजग राहून राष्ट्ररक्षणाची जबाबदारी पार पाडणाऱ्या भारतीय सैनिकांप्रमाणेच त्यांच्या कुटुंबीयांचे, विशेषतः पत्नींचे योगदानही तितकेच महत्त्वाचे आणि प्रेरणादायी असते. जवान देशसेवेसाठी घरापासून दूर असताना संपूर्ण कुटुंबाची जबाबदारी खंबीरपणे सांभाळणाऱ्या आयुनि सोनाली विकास गायकवाड यांच्या वाढदिवसानिमित्त आयोजित कार्यक्रमात हा भावनिक आणि प्रेरणादायी विचार व्यक्त करण्यात आला.

मौजे ढवळ येथील सुपुत्र आयु. विकास गायकवाड हे भारतीय सैन्य दलात कार्यरत असून राष्ट्रसेवेच्या कर्तव्यासाठी त्यांना अनेकदा कुटुंबापासून दूर राहावे लागते. अशा परिस्थितीत पत्नी म्हणून आयुनि सोनाली गायकवाड या घरातील ज्येष्ठांचा सन्मान राखत, कुटुंबातील प्रत्येक जबाबदारी समर्थपणे पार पाडत आहेत. सैनिकाच्या पत्नीचे जीवन हे केवळ प्रतीक्षेचे नसून त्यात कर्तव्य, त्याग, संघर्ष, संयम आणि कुटुंबाला एकत्र ठेवण्याची मोठी जबाबदारी असते. अनेक कौटुंबिक समारंभ, आनंदाचे क्षण आणि कौटुंबिक निर्णय सैनिकांच्या अनुपस्थितीत सांभाळताना त्यांना विविध आव्हानांना सामोरे जावे लागते; मात्र त्या न डगमगता संपूर्ण कुटुंबाचा भार समर्थपणे पेलत असतात.

यावेळी शुभेच्छा देताना आयुनि पारिजातिका जगताप म्हणाल्या, “सीमेवर देशाची सेवा करणाऱ्या जवानाच्या पत्नीचे जीवन हे त्याग, समर्पण आणि जबाबदारीचे मूर्तिमंत उदाहरण असते. सैनिक देशाचे रक्षण करत असताना त्यांच्या कुटुंबाचे रक्षण, संगोपन आणि व्यवस्थापन करण्याची मोठी जबाबदारी पत्नीवर येते. आयुनि सोनाली गायकवाड या अत्यंत संयमी, मितभाषी, प्रेमळ आणि कुटुंबवत्सल व्यक्तिमत्त्व आहेत. आपुलकी, जिव्हाळा आणि माणुसकी जपत त्या कुटुंबाची जबाबदारी समर्थपणे पार पाडत आहेत. त्यांच्या कार्यातून अनेक महिलांना प्रेरणा मिळेल. त्यांना वाढदिवसानिमित्त मनःपूर्वक शुभेच्छा.”

यावेळी भारतीय बौद्ध महासभा, शाखा सातारा जिल्हा (पूर्व) चे संस्कार सचिव सोमीनाथ घोरपडे यांनी शुभेच्छा व्यक्त करताना सांगितले की, “भगवान बुद्ध, धम्म आणि संघ या त्रिरत्नांच्या कृपेने गायकवाड परिवाराचे जीवन मंगलमय होवो. त्यांच्या सर्व सदिच्छा पूर्ण होवोत. प्रेम, मैत्री, विश्वास आणि आपुलकीची नाती अधिक दृढ होत राहोत. धम्माच्या मार्गाने हा परिवार सातत्याने प्रगतीपथावर राहो, हीच सदिच्छा.”

कार्यक्रमात भारतीय बौद्ध महासभा, शाखा फलटण तालुक्याचे माजी कोषाध्यक्ष तथा बौद्धाचार्य आयु. विठ्ठल निकाळजे सर यांनी बौद्ध धम्म संस्कार विधीनुसार मंगल विधीचे संचालन केले. उपस्थित ज्येष्ठांच्या हस्ते आयु. विकास गायकवाड व आयुनि सोनाली गायकवाड यांना शुभाशीर्वाद देण्यात आले.
यावेळी भारतीय बौद्ध महासभा परिवार (BBM Family) चे सदस्य, भारतीय बौद्ध महासभा शाखा फलटण तालुक्याचे माजी अध्यक्ष महावीर भालेराव, सरचिटणीस बाबासाहेब जगताप, प्रचार व पर्यटन विभागाचे उपाध्यक्ष रामचंद्र मोरे, संस्कार विभागाचे उपाध्यक्ष बजरंग गायकवाड, संघटक आनंद जगताप, म रा महावितरण कंपनी चे अभियंता अविनाश अहिवळे साहेब, प्रा. संध्या अहिवळे, फलटण पंचायत समितीच्या माजी सदस्या आयुनि कल्पना महावीर भालेराव, आयुनि भाग्यश्री गायकवाड, आरोग्य विभागातील आयुनि अश्विनी मोरे, योगिता घोरपडे तसेच गायकवाड परिवारातील सर्व मान्यवर सदस्य मोठ्या संख्येने उपस्थित होते.

“देशाच्या सीमांचे रक्षण करणाऱ्या जवानांइतक्याच त्यांच्या पत्नीही राष्ट्रसेवेच्या या प्रवासातील निःशब्द योद्धा असतात. कर्तव्य, त्याग आणि संयमाने त्या कुटुंबाची जबाबदारी सांभाळत समाजासमोर आदर्श निर्माण करतात.”