जावलीत बिबट्याचा धुमाकूळ ; गोफणे मळ्यात दोन पाळीव कुत्र्यांचा बळी, नागरिकांमध्ये भीतीचं वातावरण

(जावली/अजिंक्य आढाव )  जावली ता फलटण येथील गोफणे मळा परिसरात बिबट्याने पुन्हा शिरकाव करत दोन पाळीव कुत्र्यांचा बळी घेतल्याची धक्कादायक घटना समोर आली आहे. उद्धव गोफणे आणि बबन गोफणे यांचे पाळीव कुत्रे बिबट्याने फस्त केल्याने परिसरात प्रचंड भीतीचे वातावरण निर्माण झाले आहे.

वनविभागाला जाग कधी येणार..!

गेल्या काही दिवसापासून बिबट्या चा वावर होत असताना विन विभाग कोणतिही ॲक्शन घेत नसल्याने भीतीचे वातावरण निर्माण झाले आहे.

गेल्या दोन महिन्यांपासून बिबट्याचा वावर वाढत असून, यापूर्वी मिरढे येथील यादव वस्तीमध्येही त्याने हल्ले केल्याच्या घटना घडल्या होत्या. आता गोफणे मळ्यातील या घटनेमुळे नागरिकांमध्ये दहशत पसरली आहे. रात्रीच्या वेळी घराबाहेर पडण्यास लोक टाळत असून, लहान मुले व जनावरांच्या सुरक्षिततेबाबत चिंता व्यक्त केली जात आहे.

स्थानिक नागरिकांनी वन विभागाने तात्काळ कारवाई करून बिबट्याला जेरबंद करण्याची मागणी केली आहे. “आज कुत्रे गेले, उद्या माणसांवर हल्ला होईल का?” असा सवाल नागरिकांकडून उपस्थित केला जात आहे.

दरम्यान, वन विभागाने नागरिकांना सतर्क राहण्याचे आवाहन केले असून, रात्री एकटे बाहेर न जाणे, पाळीव प्राण्यांना सुरक्षित ठिकाणी बांधून ठेवणे आणि संशयास्पद हालचाली दिसल्यास तात्काळ माहिती देण्याचे सांगितले आहे.