(जावली /अजिंक्य आढाव ) – टाकळवाडे, ता. फलटण, जि. सातारा येथील टाकळवाडे विविध कार्यकारी सहकारी सेवा सोसायटी लि. मध्ये शेतकऱ्यांच्या जीवावर उठणारा धक्कादायक प्रकार उघडकीस आला आहे. पतपुरवठ्याबरोबर खते, बी-बियाणे व औषधांची विक्री करणाऱ्या या संस्थेमध्ये बनावट खतांची विक्री होत असल्याची गंभीर बाब समोर आली आहे.
महाराष्ट्र शासनाच्या कृषी विभागास काही दिवसांपूर्वी सदर संस्थेमधून बनावट खतांची विक्री होत असल्याची माहिती मिळाल्यानंतर, कृषी विभागाने तातडीने कारवाई करत संस्थेच्या गोडावूनमधील खतांचे नमुने गोळा करून प्रयोगशाळेत तपासणीसाठी पाठवले होते. प्रयोगशाळेच्या अहवालामध्ये सदर खत मानकांनुसार नसून बनावट असल्याचे स्पष्ट निष्पन्न झाले.
या प्रकरणी दि. ०८ जानेवारी २०२६ रोजी श्रीमती सोनाली सुतार, कृषी अधिकारी (गुणवत्ता नियंत्रण), फलटण तालुका कृषी विभाग यांनी दिलेल्या तक्रारीवरून फलटण ग्रामीण पोलीस ठाण्यात गुन्हा र. नं. १६/२०२६ दाखल करण्यात आला आहे.
सदर गुन्हा संस्थेच्या पदाधिकाऱ्यांविरोधात नोंद करण्यात आला आहे. या प्रकरणाचा पुढील तपास उपविभागीय पोलीस अधिकारी विशाल खांबे व पोलीस निरीक्षक संदीप जगताप यांच्या मार्गदर्शनाखाली पोलीस उपनिरीक्षक दिपक पवार करीत आहेत.
बनावट खतांच्या विक्रीमुळे शेतकऱ्यांचे मोठे आर्थिक नुकसान होण्याची शक्यता असून या घटनेमुळे परिसरात खळबळ उडाली आहे. दोषींवर कठोर कारवाईची मागणी शेतकरी वर्गातून होत आहे.
