(जावली/ अजिंक्य आढाव ): जावलीसह परिसरातील अनेक गावांमध्ये एअरटेल मोबाईल नेटवर्कची सेवा गेल्या काही दिवसांपासून अक्षरशः कोलमडली असून, नेटवर्कच्या समस्येमुळे हजारो मोबाईलधारक ग्राहक त्रस्त झाले आहेत. मोबाईलमध्ये नेटवर्कचे सिग्नल असूनही कॉल न लागणे, कॉल अचानक कट होणे, समोरच्या व्यक्तीचा आवाज न ऐकू येणे, तसेच इंटरनेटचा वेग अत्यंत कमी होणे अशा समस्यांना ग्राहकांना सातत्याने सामोरे जावे लागत आहे. विशेषतः ग्रामीण भागात मोबाईल हा केवळ संपर्काचे साधन राहिलेला नसून ऑनलाइन व्यवहार, बँकिंग, शासकीय सेवा, विद्यार्थ्यांचे ऑनलाइन शिक्षण, व्यावसायिक व्यवहार आणि विविध डिजिटल कामांसाठी मोबाईल इंटरनेटवर मोठ्या प्रमाणात अवलंबून राहावे लागते. मात्र, एअरटेलचे नेटवर्क वारंवार गायब होत असल्याने नागरिकांची महत्त्वाची कामे रखडत आहेत.
महत्त्वाच्या वेळी कॉलही लागत नाही!
जावली परिसरात अनेकदा मोबाईलवरून कॉल करण्याचा प्रयत्न केल्यानंतर कॉल कनेक्ट होत नसल्याच्या तक्रारी ग्राहकांकडून करण्यात येत आहेत. काही वेळा कॉल लागल्यानंतर काही सेकंदांतच तो कट होतो, तर काही वेळा समोरच्या व्यक्तीचा आवाज स्पष्ट ऐकू येत नाही. त्यामुळे अत्यावश्यक प्रसंगी संपर्क साधतानाही नागरिकांना मोठ्या अडचणींचा सामना करावा लागत आहे.
इंटरनेटचा वेग मंदावल्याने ऑनलाइन कामे ठप्प
मोबाईल इंटरनेटचा वेग अत्यंत कमी झाल्यामुळे ऑनलाइन पेमेंट, यूपीआय व्यवहार, सोशल मीडिया, व्हिडिओ कॉल, ऑनलाइन अर्ज तसेच विद्यार्थ्यांच्या शैक्षणिक कामांवर परिणाम होत आहे. इंटरनेट सुरू असूनही प्रत्यक्षात कोणतेही पेज उघडण्यास बराच वेळ लागत असल्याने ग्राहकांमध्ये संतापाची भावना निर्माण झाली आहे.
ग्राहकांकडून पैसे मात्र पूर्ण, सेवा अपुरी
दर महिन्याला रिचार्जचे पैसे नियमितपणे भरूनही अपेक्षित दर्जाची सेवा मिळत नसल्याची भावना ग्राहकांमध्ये आहे. नेटवर्कच्या समस्येबाबत कंपनीच्या ग्राहकसेवा विभागाशी संपर्क साधूनही कायमस्वरूपी तोडगा निघत नसल्याच्या तक्रारी नागरिकांकडून होत आहेत.
नेटवर्कचा तांत्रिक बिघाड तातडीने दूर करण्याची मागणी
जावलीसह परिसरातील नेटवर्कची प्रत्यक्ष पाहणी करून आवश्यक त्या ठिकाणी नवीन तांत्रिक सुविधा, अतिरिक्त क्षमता किंवा नेटवर्क टॉवरमध्ये सुधारणा करण्यात यावी. ग्रामीण भागातील ग्राहकांनाही शहराप्रमाणे दर्जेदार मोबाईल सेवा मिळणे आवश्यक आहे. त्यामुळे संबंधित कंपनीच्या अधिकाऱ्यांनी या समस्येची गांभीर्याने दखल घेऊन तातडीने नेटवर्क सेवा सुरळीत करावी, अशी मागणी नागरिकांकडून होत आहे.
नेटवर्कची समस्या अशीच कायम राहिल्यास अनेक ग्राहक दुसऱ्या मोबाईल सेवा कंपन्यांकडे जाण्याच्या तयारीत असल्याचेही बोलले जात आहे. त्यामुळे ग्राहकांची नाराजी वाढण्यापूर्वी एअरटेल प्रशासनाने जावली परिसरातील नेटवर्क समस्या तातडीने सोडवावी, अशी अपेक्षा व्यक्त होत आहे.
