रामराजेंच्या बुद्धिकौशल्याला संजीवराजे, चेअरमन-व्हाईस चेअरमन व संचालक मंडळाच्या प्रयत्नांची साथ; ७० व्या गळीत हंगामाच्या शुभारंभाने तालुक्यात आनंदाचे वातावरण
(फलटण /प्रतिनिधी): श्रीराम सहकारी साखर कारखाना सुरू होऊ नये, कारखाना अडचणीत यावा, यासाठी प्रयत्न करणाऱ्या विघ्नसंतोषींचे डाव अखेर उधळले गेल्याची चर्चा आता फलटण तालुक्यात रंगू लागली आहे. श्रीमंत रामराजे नाईक निंबाळकर यांच्या बुद्धिकौशल्यपूर्ण नेतृत्वाला कारखान्याचे चेअरमन श्रीमंत संजीवराजे नाईक निंबाळकर, व्हाईस चेअरमन आणि संपूर्ण संचालक मंडळाच्या अथक प्रयत्नांची साथ मिळाली आणि श्रीराम सहकारी साखर कारखान्याच्या ७० व्या गळीत हंगामाचा शुभारंभ झाला. या यशाचा आनंद साजरा करण्यासाठी राजे गटाच्या कार्यकर्त्यांनी फलटण शहरात साखर पेढे वाटून जल्लोष केला.
कारखाना सुरू होण्याच्या प्रक्रियेत अनेक अडचणी निर्माण झाल्या. मात्र, या अडचणींवर मात करत कारखाना सुरू करण्यात रामराजेंचे नेतृत्व, संजीवराजेंचे प्रयत्न आणि चेअरमन, व्हाईस चेअरमन व सर्व संचालक मंडळाची भूमिका महत्त्वाची ठरली. त्यामुळे कारखाना सुरू होण्याचा हा क्षण केवळ एका गळीत हंगामाचा प्रारंभ नसून, शेतकरी-कष्टकऱ्यांच्या आशा-अपेक्षांना बळ देणारा ठरला आहे.
कारखाना सुरू होताच पेढे वाटप; चौकाचौकांत चर्चांना उधाण!
श्रीराम कारखान्याच्या ७० व्या गळीत हंगामाचा शुभारंभ होताच राजे गटाच्या कार्यकर्त्यांनी फलटण शहरात साखर पेढे वाटून आनंदोत्सव साजरा केला. या पेढे वाटपामुळे शहरातील राजकीय वातावरणातही उत्साह निर्माण झाला. कारखाना सुरू होणार की नाही, याबाबत गेल्या काही दिवसांपासून सुरू असलेल्या चर्चांना आता नवे वळण मिळाले असून, शहरातील चौकाचौकांत आणि नागरिकांच्या गप्पांमध्ये श्रीराम कारखाना, राजे गटाचे नेतृत्व आणि कारखाना सुरू करण्यासाठी झालेल्या प्रयत्नांची चर्चा रंगू लागली आहे.
‘कारखाना सुरू होऊ नये’ अशी अपेक्षा बाळगणाऱ्यांच्या मनसुब्यांवर पाणी फिरले, अशी भावना राजे गटाच्या कार्यकर्त्यांकडून व्यक्त होत आहे. मात्र, या सर्व राजकीय चर्चांपेक्षा कारखाना प्रत्यक्ष सुरू होणे, शेतकऱ्यांच्या उसाचे गाळप होणे आणि कामगारांच्या हाताला काम मिळणे, हेच तालुक्याच्या दृष्टीने अधिक महत्त्वाचे असल्याची भावना नागरिकांतून व्यक्त होत आहे.
श्रीराम कारखाना म्हणजे तालुक्याची अर्थवाहिनी.!
श्रीराम सहकारी साखर कारखाना हा फलटण तालुक्यातील शेतकरी, कष्टकरी, ऊस उत्पादक आणि कामगारांच्या जिव्हाळ्याचा प्रश्न आहे. कारखान्याशी अनेक कुटुंबांचे आर्थिक हित जोडलेले आहे. त्यामुळे कारखान्याचा ७० वा गळीत हंगाम सुरू झाल्याने तालुक्याच्या अर्थचक्राला गती मिळण्याची अपेक्षा आहे. कारखान्याचे कामकाज सुरळीत चालावे आणि शेतकरी-कामगारांचे हित जपले जावे, हीच सर्वांची अपेक्षा आहे.
या साखर पेढे वाटप व आनंदोत्सवाच्या वेळी श्री. अमरसिंह खानविलकर, श्री. किशोर तारळकर, श्री. मोहनराव पोतेकर, श्री. विकास काकडे, श्री. सिकंदर डांगे, श्री. अतुल मोहोळकर, श्री. अजय शिंदे, श्री. माधव मदने आणि श्री. रविंद्र करचे यांच्यासह राजे गटाचे कार्यकर्ते उपस्थित होते.
कारखाना सुरू झाला, पेढे वाटून आनंद साजरा झाला आणि विघ्नसंतोषींच्या कथित डावपेचांवरून फलटणच्या राजकीय वर्तुळात चर्चांना उधाण आले! श्रीराम कारखान्याच्या ७० व्या गळीत हंगामाच्या शुभारंभाने संपूर्ण तालुक्यात आनंदाचे वातावरण निर्माण झाले असून, आता सर्वांचे लक्ष कारखान्याच्या यशस्वी वाटचालीकडे लागले आहे.
