भर बाजारात पथदिवा कोसळला ; दोन ते तीन भाजी विक्रेते जखमी — पालखी मार्गावरील विद्युत रोषणाईच्या सुरक्षिततेवर गंभीर प्रश्न

घटनेची माहिती मिळताच नगरसेवक विकास काकडे, विशाल तेली आणि संदीप चोरमले यांनी तातडीने घटनास्थळी धाव घेतली. नगर परिषदेच्या कर्मचाऱ्यांसह त्यांनी पडलेला खांब हटविणे, परिसर सुरक्षित करणे, वाहतूक सुरळीत करणे आणि जखमींना मदत करण्याचे काम तातडीने हाती घेतले. घटनेमुळे परिसरात काही काळ गोंधळाचे वातावरण निर्माण झाले असून नागरिकांनी मोठी गर्दी केली होती.

दरम्यान, पालखी मार्गावरील विद्युत पथदिव्यांशी संबंधित ही पहिली दुर्घटना नसल्याने नागरिकांमध्ये संताप व्यक्त होत आहे. काही दिवसांपूर्वी फलटण एसटी स्थानकासमोर एसटी बसचा धक्का लागून एक विद्युत पथदिवा कोसळला होता. त्यानंतर विद्युत पुरवठ्यासाठी बसविण्यात आलेल्या बॉक्सला विजेचा धक्का लागून एका गाढवाचा मृत्यू झाल्याची घटना घडली होती. या सलग घटनांमुळे विद्युत सुरक्षिततेबाबत गंभीर प्रश्न निर्माण झाले आहेत.

भर बाजारात पुन्हा पथदिवा कोसळल्याने पालखी मार्गावरील विद्युत रोषणाईच्या कामाचा दर्जा, खांबांची उभारणी, तांत्रिक मानके आणि सुरक्षिततेच्या उपाययोजनांवर नागरिकांनी तीव्र नाराजी व्यक्त केली आहे. हे काम आवश्यक निकषांनुसार झाले आहे का, संबंधित यंत्रणांनी गुणवत्ता तपासणी केली होती का, याची सखोल चौकशी करण्याची मागणी जोर धरत आहे.

अपघातात जखमी झालेल्या भाजी विक्रेत्यांच्या उपचाराचा खर्च कोण उचलणार, त्यांना नुकसानभरपाई मिळणार का आणि संबंधित कंत्राटदार तसेच जबाबदार अधिकाऱ्यांवर कारवाई होणार का, असे प्रश्नही नागरिकांकडून उपस्थित केले जात आहेत.

या संपूर्ण प्रकरणाची निष्पक्ष चौकशी करून दोषींवर कठोर कारवाई करावी, जखमींना तातडीने आर्थिक मदत व नुकसानभरपाई द्यावी आणि भविष्यात अशा घटना टाळण्यासाठी पालखी मार्गावरील सर्व विद्युत पथदिव्यांची तांत्रिक तपासणी करून आवश्यक त्या सुरक्षिततेच्या उपाययोजना तातडीने राबवाव्यात, अशी जोरदार मागणी नागरिकांकडून करण्यात येत आहे.