(जावली /अजिंक्य आढाव ):JEE Main 2026 आणि NEET-UG 2026 या देशातील प्रतिष्ठित प्रवेश परीक्षांमध्ये उल्लेखनीय यश संपादन करणाऱ्या धुळदेव येथील कु. स्वराली निरंजन वेदपाठक हिचा तिच्या राहत्या घरी जाऊन मान्यवरांच्या हस्ते सत्कार करण्यात आला. यावेळी तिच्यासह आई-वडिलांचेही अभिनंदन करून पुढील शैक्षणिक वाटचालीसाठी शुभेच्छा देण्यात आल्या.
स्वरालीने JEE Main 2026 सत्र-1 मध्ये 97.388 NTA स्कोअर मिळवला असून, NEET-UG 2026 परीक्षेत 720 पैकी 547 गुण (97.99 टक्के) प्राप्त केले आहेत. तसेच तिने ऑल इंडिया रँक 40,123 मिळवत अभियांत्रिकी आणि वैद्यकीय प्रवेशाच्या दोन्ही राष्ट्रीय स्तरावरील परीक्षांमध्ये उल्लेखनीय कामगिरी केली आहे. तिच्या या यशाबद्दल परिसरातून अभिनंदनाचा वर्षाव होत आहे.
यावेळी रयत शिक्षण संस्थेच्या श्रीमानशेठ धन्यकुमार रतनचंद गांधी विद्यालय, धुळदेव येथील स्वरालीचे माजी शिक्षक तथा कर्मवीर भाऊराव पाटील विद्यालय, बिजवडी येथील प्रयोगशील शिक्षक आयु. बाबासाहेब जगताप, कै. मल्हारराव सस्ते हायस्कूल, सस्तेवाडी येथील शिक्षक बजरंग गायकवाड, प्रगत शिक्षण संस्थेचे जनसंपर्क अधिकारी सोमीनाथ घोरपडे तसेच सामाजिक कार्यकर्ते आयु. आनंद जगताप यांनी तिच्या घरी भेट देऊन अभिनंदन केले.
सत्कार प्रसंगी स्वरालीचा शाल, पुष्पगुच्छ देऊन सन्मान करण्यात आला तसेच मिठाई भरवून तिच्या यशाचा आनंद साजरा करण्यात आला. उपस्थितांनी तिच्या जिद्द, मेहनत आणि गुणवत्तेचे कौतुक करत पुढील शैक्षणिक वाटचालीसाठी शुभेच्छा दिल्या.
यावेळी शिक्षक बाबासाहेब जगताप यांनी स्वरालीच्या प्राथमिक व माध्यमिक शिक्षणातील आठवणींना उजाळा देत, लहानपणापासूनच तिच्यात असलेली जिज्ञासा, सातत्यपूर्ण अभ्यास आणि कठोर परिश्रमाची वृत्ती अधोरेखित केली. आई-वडिलांचे पाठबळ, शिक्षकांचे मार्गदर्शन आणि स्वतःची चिकाटी यांच्या बळावर स्वरालीने मिळविलेले हे यश इतर विद्यार्थ्यांसाठी प्रेरणादायी असल्याचे त्यांनी सांगितले.
About the Author
