(फलटण/ प्रतिनिधी): वाढदिवसाचा अनावश्यक खर्च टाळून सामाजिक बांधिलकी जपत गरजू विद्यार्थ्यांसाठी मदतीचा हात पुढे करत विश्वजीत सुभाष मठपती यांनी आपला वाढदिवस महात्मा शिक्षण संस्था संचलित मूकबधिर विद्यालयातील विद्यार्थ्यांसोबत साजरा केला. त्यांच्या या उपक्रमातून सामाजिक संवेदनशीलतेचे दर्शन घडले.
वाढदिवसानिमित्त कोणताही अनावश्यक खर्च न करता समाजातील गरजू घटकांसाठी योगदान देण्याच्या उद्देशाने मठपती यांनी मूकबधिर विद्यालयातील विद्यार्थ्यांसाठी चालविण्यात येणाऱ्या विनाअनुदानित वसतिगृहास जीवनावश्यक वस्तूंचे वाटप केले. यामध्ये गहू, तांदूळ, साखर तसेच विद्यार्थ्यांसाठी पार्ले बिस्किटांचा समावेश होता.
वसतिगृहातील विद्यार्थ्यांच्या दैनंदिन गरजा लक्षात घेऊन करण्यात आलेल्या या मदतीमुळे विद्यार्थ्यांसह वसतिगृह व्यवस्थापनालाही आधार मिळाला. यावेळी विश्वजीत मठपती यांनी विद्यार्थ्यांसोबत वेळ घालवत त्यांच्या शिक्षणाची, दैनंदिन जीवनाची तसेच अडचणींची माहिती जाणून घेतली. विद्यार्थ्यांनीही त्यांना वाढदिवसाच्या मनःपूर्वक शुभेच्छा दिल्या.
आजच्या काळात वाढदिवस म्हटले की पार्ट्या, अनावश्यक खर्च आणि दिखाव्याला महत्त्व दिले जाते. मात्र, आपला आनंद गरजू आणि वंचित घटकांसोबत वाटून घेण्याचा निर्णय घेत मठपती यांनी सामाजिक बांधिलकीचा वेगळा आदर्श निर्माण केला आहे. विशेषतः मूकबधिर विद्यार्थ्यांसाठी शासनाची नियमित मदत उपलब्ध नसतानाही त्यांच्या निवास, शिक्षण आणि दैनंदिन गरजा पूर्ण करण्यासाठी सुरू असलेल्या प्रयत्नांना अशा सामाजिक मदतीमुळे हातभार लागतो.
‘आपला आनंद इतरांच्या चेहऱ्यावर दिसला, तर त्यापेक्षा मोठा वाढदिवसाचा आनंद कोणता?’ या भावनेतून करण्यात आलेला हा उपक्रम विद्यार्थ्यांच्या चेहऱ्यावर आनंद फुलवणारा ठरला. सामाजिक संवेदनशीलता आणि सेवाभाव जपणाऱ्या या उपक्रमाचे उपस्थितांकडून कौतुक करण्यात आले.
यावेळी युवा उद्योजक अमर पिसाळ, सुमित मठपती, प्रद्युमन मठपती, स्वप्नील पवार, जीवन पिसाळ, अक्षय जगदाळे, उत्सव वाघमारे, निलेश पवार, अनुज मठपती तसेच विद्यालयातील शिक्षकवर्ग उपस्थित होता.
विद्यार्थ्यांच्या चेहऱ्यावर उमटलेला आनंद आणि त्यांच्याकडून मिळालेल्या शुभेच्छांमुळे विश्वजीत मठपती यांचा वाढदिवस विशेष आणि अविस्मरणीय ठरला.
About the Author
