filter: 0; fileterIntensity: 0.000000; filterMask: 0; captureOrientation: 90; hdrForward: 6; shaking: 0.000733; highlight: 1; algolist: 0; multi-frame: 1; brp_mask: 8; brp_del_th: 0.0000,0.0000; brp_del_sen: 0.1500,0.1500; delta:null; module: photo;hw-remosaic: false;touch: (-1.0, -1.0);sceneMode: 7864320;cct_value: 0;AI_Scene: (-1, -1);aec_lux: 0.0;aec_lux_index: 0;albedo: ;confidence: ;motionLevel: -1;weatherinfo: null;temperature: 35;zeissColor: bright;
(जावली/ अजिंक्य आढाव )फलटण–शिखर शिंगणापूर मार्गालगत वडले पाटील वस्ती या ठिकाणी असलेले महावितरणचे अनेक वीज खांब मोठ्या प्रमाणात झुकल्याने गंभीर अपघाताचा धोका निर्माण झाला आहे. विशेषतः रस्त्यालगत तसेच शेतकऱ्यांच्या बांधावर उभारण्यात आलेले अनेक वीज खांब धोकादायक अवस्थेत असून, केव्हाही कोसळण्याची भीती व्यक्त केली जात आहे. त्यामुळे वाहनचालक, शेतकरी आणि परिसरातील ग्रामस्थांमध्ये भीतीचे वातावरण निर्माण झाले आहे.
या मार्गावर दररोज शेकडो लहान-मोठी वाहने, दुचाकीस्वार, शेतकरी आणि ग्रामस्थांची मोठ्या प्रमाणात ये-जा असते. मात्र अनेक ठिकाणी वीज खांब एका बाजूला झुकलेले असून त्यावरील विद्युत तारा सैल झालेल्या दिसून येत आहेत. काही ठिकाणी खांबांची स्थिती इतकी खराब झाली आहे की, जोरदार वारा किंवा मुसळधार पाऊस झाल्यास हे खांब कोसळण्याची शक्यता नाकारता येत नाही.
परिसरातील शेतकऱ्यांच्या बांधावरील वीज खांबही अत्यंत धोकादायक स्थितीत असून, शेतीची कामे करताना शेतकऱ्यांना जीव मुठीत धरून काम करावे लागत आहे. शेती मशागतीसाठी ट्रॅक्टर, अवजड यंत्रसामग्री तसेच मजुरांची सतत वर्दळ असते. अशा वेळी वीज खांब कोसळल्यास मोठी जीवितहानी होण्याची शक्यता व्यक्त केली जात आहे.
सध्या पावसाळ्याचे दिवस सुरू असून सततचा पाऊस, वादळी वारे आणि विजांच्या कडकडाटामुळे परिस्थिती अधिक गंभीर बनली आहे. वादळामुळे झुकलेले खांब पूर्णपणे उन्मळून पडण्याची तसेच विद्युत तारा तुटून रस्त्यावर किंवा शेतामध्ये पडण्याची भीती निर्माण झाली आहे. अशा दुर्घटनेमुळे जनावरे, शेतकरी, वाहनचालक आणि पादचाऱ्यांच्या जीवाला मोठा धोका निर्माण होऊ शकतो.
स्थानिक नागरिकांनी अनेक वेळा महावितरणच्या संबंधित अधिकाऱ्यांचे लक्ष या समस्येकडे वेधले असल्याचा दावा केला जात आहे. मात्र अद्याप कोणतीही ठोस उपाययोजना करण्यात आलेली नसल्याने महावितरण प्रशासनाच्या दुर्लक्षाबाबत नागरिकांमध्ये तीव्र नाराजी व्यक्त होत आहे. एखादी मोठी दुर्घटना घडल्यानंतरच प्रशासन जागे होणार का, असा संतप्त सवाल ग्रामस्थांकडून उपस्थित केला जात आहे.
कोणतीही अनुचित घटना घडण्यापूर्वी महावितरण विभागाने तातडीने प्रत्यक्ष पाहणी करून धोकादायक वीज खांबांची दुरुस्ती करावी, आवश्यक त्या ठिकाणी नवीन खांब उभारावेत तसेच विद्युत तारा सुरक्षित पद्धतीने बसवाव्यात, अशी जोरदार मागणी परिसरातील नागरिक, शेतकरी व वाहनचालकांकडून करण्यात येत आहे.
नागरिकांच्या जीविताच्या सुरक्षेचा प्रश्न लक्षात घेऊन महावितरण प्रशासनाने या गंभीर समस्येकडे तातडीने लक्ष देत आवश्यक कार्यवाही करावी, अशी एकमुखी मागणी होत आहे.
About the Author
