७१ मते मिळवत संजीवराजेंनी मारली बाजी; जिल्हा बँकेच्या निवडणुकीत प्रतिष्ठेच्या लढतीचा निकाल
(फलटण | प्रतिनिधी ): संपूर्ण सातारा जिल्ह्याचे लक्ष लागून राहिलेल्या सातारा जिल्हा मध्यवर्ती सहकारी बँकेच्या निवडणुकीत फलटण सोसायटी मतदारसंघातून शिवसेनेचे उमेदवार श्रीमंत संजीवराजे नाईक निंबाळकर यांनी विजय संपादन केला. फलटण नगरपरिषदेचे विद्यमान नगराध्यक्ष तथा भाजपचे उमेदवार समशेरसिंह नाईक निंबाळकर यांचा पराभव करत संजीवराजे यांनी सहकार क्षेत्रातील आपले राजकीय स्थान पुन्हा अधोरेखित केले. या निकालामुळे फलटणच्या राजकीय वर्तुळात चर्चांना उधाण आले आहे.
मंगळवारी (दि. ३ नोव्हेंबर) सकाळी आठ वाजता मतमोजणीला सुरुवात झाली. सुरुवातीपासूनच या प्रतिष्ठेच्या लढतीकडे जिल्ह्याचे लक्ष लागले होते. अखेरच्या टप्प्यापर्यंत निकालाबाबत उत्सुकता कायम असताना संजीवराजे नाईक निंबाळकर यांनी ७१ मते मिळवत विजयावर शिक्कामोर्तब केले. समशेरसिंह नाईक निंबाळकर यांना ६० मते मिळाली.
निंबाळकर घराण्यातील प्रतिष्ठेची लढत चर्चेत
फलटण सोसायटी मतदारसंघातील ही निवडणूक केवळ जिल्हा बँकेच्या संचालकपदाची निवडणूक न राहता फलटणच्या राजकारणातील दोन प्रमुख चेहऱ्यांमधील प्रतिष्ठेची लढत ठरली होती. एका बाजूला माजी जिल्हा परिषद अध्यक्ष श्रीमंत संजीवराजे नाईक निंबाळकर, तर दुसऱ्या बाजूला फलटण नगरपरिषदेचे विद्यमान नगराध्यक्ष समशेरसिंह नाईक निंबाळकर यांच्यात थेट सामना रंगला होता. या लढतीत मतदारांनी संजीवराजे यांच्या बाजूने कौल दिला.
विजयानंतर समर्थकांचा जल्लोष
विजयाची बातमी फलटणमध्ये पोहोचताच समर्थक आणि कार्यकर्त्यांमध्ये उत्साहाचे वातावरण निर्माण झाले. फटाक्यांची आतषबाजी, ढोल-ताशांचा गजर आणि गुलालाची उधळण करीत कार्यकर्त्यांनी विजयाचा आनंद साजरा केला.
जिल्हा बँकेच्या राजकारणात फलटणचे महत्त्व वाढले
सातारा जिल्हा मध्यवर्ती सहकारी बँकेच्या राजकारणात फलटणचे स्थान नेहमीच महत्त्वाचे राहिले आहे. संजीवराजे यांच्या या विजयामुळे जिल्हा बँकेतील त्यांचे राजकीय वजन पुन्हा चर्चेत आले आहे. या निकालाचे पडसाद आगामी काळात फलटणच्या स्थानिक राजकारणासह जिल्ह्यातील सहकार क्षेत्रातील समीकरणांवर कसे उमटतात, याकडे आता सर्वांचे लक्ष लागले आहे.
