पहिल्याच प्रयत्नात राज्यात 38 वा क्रमांक ; तावडीच्या कु. शिवांजली भोसलेची ड्रग इन्स्पेक्टर पदावर दमदार निवड

शिवांजली ही तावडी येथील शेतकरी व सामाजिक कार्यकर्ते रणधीर भीमराव भोसले आणि सौ. शालिनी रणधीर भोसले यांची कन्या आहे. तिचे प्राथमिक शिक्षण जिल्हा परिषद शाळा, तावडी येथे झाले. माध्यमिक शिक्षण वेणूताई चव्हाण गर्ल्स हायस्कूल, फलटण, उच्च माध्यमिक शिक्षण श्रीमंत मालोजीराजे शेती विद्यालय, फलटण येथे पूर्ण केले. त्यानंतर गव्हर्नमेंट कॉलेज ऑफ फार्मसी, कराड येथून बी. फार्मसी पदवी संपादन केली.

शालेय जीवनापासूनच अभ्यासाबरोबर वादविवाद, वक्तृत्व, नृत्य आणि क्रीडा स्पर्धांमध्ये सातत्याने उल्लेखनीय कामगिरी करणारी शिवांजली ही शिक्षकांची लाडकी आणि गुणवंत विद्यार्थिनी म्हणून ओळखली जात होती. तिच्या अभ्यासू वृत्तीमुळे आजही ती शिकलेल्या शाळांमध्ये आदर्श विद्यार्थिनी म्हणून स्मरणात आहे.

या यशाचे श्रेय ती आपल्या आई-वडिलांसह मामांना देते. तिची आई एम.ए., डी.एड. शिक्षित असून लहानपणापासून शिक्षणासोबतच समाजसुधारकांचे विचार, वाचनाची सवय आणि मूल्याधिष्ठित संस्कार दिल्यामुळेच स्वतःची जडणघडण झाली, असे शिवांजली सांगते. फलटण परिसरात मिळालेल्या शिक्षणाच्या बळावर कठोर परिश्रम घेत हे यश मिळवता आले, असेही तिने नमूद केले.

महात्मा फुले, राजर्षी शाहू महाराज आणि डॉ. बाबासाहेब आंबेडकर यांच्या विचारांवर नितांत श्रद्धा असल्याचे सांगताना, “शिका, संघटित व्हा आणि संघर्ष करा” तसेच “शिक्षण हे वाघिणीचे दूध आहे…” हा डॉ. बाबासाहेब आंबेडकरांचा विचार मला सतत प्रेरणा देत राहिला आणि त्याच प्रेरणेतून हे यश मिळवू शकले, अशी भावना शिवांजलीने व्यक्त केली.

महाराष्ट्र राज्य गावकामगार पोलीस पाटील संघाचे फलटण तालुका अध्यक्ष अमोल आढाव यांची शिवांजली ही भाची असून गुणवरे येथील आजी-आजोबांकडूनही तिला शिक्षण आणि संस्कारांचे बळ मिळाल्याचे तिने आवर्जून सांगितले.

पहिल्याच प्रयत्नात राज्यस्तरीय स्पर्धा परीक्षेत एवढे मोठे यश मिळवत शिवांजली भोसले हिने फलटण तालुक्याच्या शिरपेचात मानाचा तुरा रोवला आहे. तिच्या या उल्लेखनीय यशाबद्दल फलटण, बारामती, सातारा, पुणे आणि मुंबई येथील सामाजिक, शैक्षणिक, राजकीय, कृषी व औद्योगिक क्षेत्रातील मान्यवरांनी तिचे अभिनंदन करून पुढील कारकिर्दीस शुभेच्छा दिल्या आहेत.